Maniffesto Mozilla

Mae Maniffesto Mozilla, a ysgrifennwyd yn 2007, yn amlinellu ein hegwyddorion craidd. Ysgrifennwyd The Pledge for a Healthy Internet fel atodiad i'r Maniffesto yn 2017 i adlewyrchu ein hymrwymiad dwfn i sicrhau bod y rhyngrwyd yn gwasanaethu anghenion bodau dynol a'r ddynoliaeth gyfan. Gyda'i gilydd, mae'r ddwy ddogfen hyn yn arwain yr holl waith ar draws Mozilla — yr hyn yr ydym yn ei adeiladu, yr hyn yr ydym yn ei ariannu a sut yr ydym yn gweithio gyda'n gilydd fel cymuned.

Cyflwyniad

Mae'r Rhyngrwyd yn dod yn rhan gynyddol bwysig o'n bywydau.

Mae'r Project Mozilla yn gymuned fyd-eang o bobl sy'n credu bod bod yn agored, arloesol a chynnig cyfleoedd yn allweddol i iechyd parhaus y rhyngrwyd. Rydym wedi gweithio gyda’n gilydd ers 1998 i sicrhau bod y rhyngrwyd yn cael ei datblygu mewn ffordd sydd o fudd i bawb. Rydym yn fwyaf adnabyddus am greu porwr gwe Mozilla Firefox.

Mae'r Project Mozilla yn defnyddio dull cymunedol i greu meddalwedd cod agored o'r radd flaenaf ac i ddatblygu mathau newydd o weithgareddau cydweithredol. Rydym yn creu cymunedau o bobl sy'n ymwneud â gwneud y profiad rhyngrwyd yn well i bob un ohonom.

O ganlyniad i'r ymdrechion hyn, rydym wedi distyllu set o egwyddorion y credwn eu bod yn hanfodol ar gyfer y Rhyngrwyd i barhau i gynnig budd i'r cyhoedd yn ogystal ag agweddau masnachol ar fywyd. Rydym yn gosod allan yr egwyddorion hyn isod.

Y nodau ar gyfer y Maniffesto yw i:

  1. mynegi gweledigaeth ar gyfer y rhyngrwyd y mae cyfranogwyr Mozilla am i Mozilla Foundation ei dilyn;
  2. siarad â phobl os oes ganddynt gefndir technegol neu beidio;
  3. gwneud cyfranwyr Mozilla yn falch o'r hyn rydym yn ei wneud a'n hannog ni i barhau; a
  4. darparu fframwaith i bobl eraill hybu y weledigaeth hon o'r Rhyngrwyd.

Daw'r egwyddorion hyn ddim yn fyw ar eu pen eu hunain. Mae angen i bobl wneud y rhyngrwyd yn agored ac yn gyfranogol - pobl yn gweithredu fel unigolion, yn gweithio gyda'i gilydd mewn grwpiau, ac yn arwain eraill. Mae Mozilla Foundation wedi ymrwymo i hyrwyddo'r egwyddorion sydd i'w gweld ym Maniffesto Mozilla. Rydym yn gwahodd eraill i ymuno â ni a gwneud y rhyngrwyd yn lle gwell fyth i bawb.

Egwyddorion

  1. Egwyddor 1
    Mae'r rhyngrwyd yn rhan annatod o fywyd modern—yn elfen allweddol mewn addysg, cyfathrebu, cydweithredu, busnes, adloniant a chymdeithas yn gyffredinol.
  2. Egwyddor 2
    Mae'r rhyngrwyd yn adnodd cyhoeddus byd-eang y mae'n rhaid iddo aros yn agored a hygyrch.
  3. Egwyddor 3
    Rhaid i'r rhyngrwyd gyfoethogi bywydau unigolion.
  4. Egwyddor 4
    Mae diogelwch a phreifatrwydd unigolion ar y rhyngrwyd yn fater sylfaenol ac nid oes modd eu trin fel mater dewisol.
  5. Egwyddor 5
    Rhaid i unigolion gael y gallu i lunio'r rhyngrwyd a'u profiadau arno.
  6. Egwyddor 6
    Mae effeithiolrwydd y Rhyngrwyd fel adnodd cyhoeddus yn dibynnu ar y gallu i ryngweithredu (protocolau, fformatau data, cynnwys), arloesi a chyfranogiad datganoledig ledled y byd.
  7. Egwyddor 7
    Mae meddalwedd cod agored, rhydd ac am ddim yn hyrwyddo datblygiad y Rhyngrwyd fel adnodd cyhoeddus.
  8. Egwyddor 8
    Mae prosesau tryloyw cymunedol yn hyrwyddo cyfranogiad, atebolrwydd, ac ymddiriedaeth.
  9. Egwyddor 9
    Mae cyfranogiad masnachol yn natblygiad y rhyngrwyd yn dod â llawer o fuddion; mae cael cydbwysedd rhwng elw masnachol a budd cyhoeddus yn hanfodol.
  10. Egwyddor 10
    Mae cynyddu agweddau budd cyhoeddus y Rhyngrwyd yn nod pwysig, teilwng o'n hamser, sylw ac ymrwymiad.

Addewid ar Gyfer Rhyngrwyd Iach

Rhyngrwyd byd-eang, agored yw'r adnodd mwyaf pwerus o gyfathrebu a chydweithredu rydym wedi ei weld erioed. Mae'n ymgorffori rhai o'n gobeithion dyfnaf ar gyfer cynnydd dynol. Mae'n galluogi cyfleoedd newydd ar gyfer dysgu, adeiladu ymdeimlad o ddynoliaeth gyffredin, a datrys y problemau dybryd sy'n wynebu pobl ym mhobman.

Dros y degawd diwethaf, rydym wedi gweld yr addewid hwn yn cael ei wireddu mewn llawer o ffyrdd. Rydym hefyd wedi gweld grym y rhyngrwyd yn cael ei ddefnyddio i chwyddo rhwygiadau, ysgogi trais, hybu atgasedd, a cham drin ffaith a realiti yn fwriadol. Rydym wedi dysgu y dylwn nodi'n fwy penodol at ein dyheadau ar gyfer y profiad dynol o'r rhyngrwyd. Rydym yn gwneud hynny nawr.

Ein Hymrwymiadau

  1. Ymrwymiad 1
    Rydym yn ymrwymedig i ryngrwyd sy'n cynnwys holl bobloedd y byd — lle nad yw nodweddion demograffig person yn pennu eu mynediad ar-lein, eu cyfleoedd nag ansawdd eu profiad.
  2. Ymrwymiad 2
    Rydym yn ymroddedig i ryngrwyd sy'n hybu trafodaethau dinesig, urddas pobl a mynegiant unigolion.
  3. Ymrwymiad 3
    Rydym yn ymroddedig i ryngrwyd sy'n dyrchafu meddwl beirniadol, ymresymu rhesymedig, gwybodaeth wedi ei rannu a ffeithiau dilys.
  4. Ymrwymiad 4
    Rydym yn ymroddedig i rhyngrwyd sy'n hyrwyddo cydweithio rhwng cymunedau amrywiol yn gweithio gyda'i gilydd er lles cyffredinol.

Addewid Mozilla

Ar draws Project Mozilla a phob sefydliad yn y teulu Mozilla, rydym yn addo cefnogi Maniffesto Mozilla yn ei weithgareddau. Yn benodol, byddwn yn:

  • adeiladu a galluogi technolegau a chymunedau cod agored sy'n cefnogi egwyddorion y Maniffesto;
  • adeiladu a chyflwyno cynnyrch gwych i ddefnyddwyr sy'n cefnogi egwyddorion y Maniffesto;
  • ddefnyddio asedau Mozilla (eiddo deallusol megis hawlfraint a nodau masnach, seilwaith, cronfeydd, ac enw da) i gadw'r Rhyngrwyd yn llwyfan agored;
  • hyrwyddo modelau ar gyfer creu gwerth economaidd er budd y cyhoedd, a
  • hyrwyddo egwyddorion Maniffesto Mozilla mewn trafodaethau cyhoeddus ac o fewn diwydiant y Rhyngrwyd.

Rydym Eich Angen Chi Symud y Maniffesto yn ei Flaen

Bydd rhyngrwyd gyda'r rhinweddau hyn ddim yn dod yn fyw ar ei ben ei hun. Rhaid i bobl a sefydliadau ymgorffori'r dyheadau hyn i mewn i dechnoleg rhyngrwyd ac i'r profiad dynol gyda'r rhyngrwyd. Mae Maniffesto ac Adendwm Mozilla yn cynrychioli ymrwymiad Mozilla i hyrwyddo'r dyheadau hyn. Mae Mozilla yn gweithio gyda phobl a sefydliadau ym mhobman sydd am wneud y rhyngrwyd yn lle gwell fyth i bawb.

Os ydych chi'n rhannu'r nod hwn, rhowch wybod i ni sut y gallwn ni helpu.

Ac, wrth gwrs, rydym ni'n cynhyrchu Firefox a Thunderbird). Nod hyn oll yw helpu pobl i wneud y rhyngrwyd yn lle iach.