Manifest Mozilla

Manifest Mozilla, napisany w lěće 2007, naše hłowne principy wobrysuje. Slub za strowy internet je so jako dodawk k manifestej w lěće 2017 napisał, zo by naš hłuboki zawjazk wotbłyšćuje, zo by zawěsćił, zo internet ludźom a čłowjestwu jako cyłk słuži. Hromadźe tutej dwaj dokumentaj dźěło přez Mozilla wodźitej – štož wuwiwamy, štož financujemy a kak jako zhromadźenstwo hromadźe dźěłamy.

Zawod

Internet budźe dźeń a wažniši dźěl našeho žiwjenja.

Projekt Mozilla je gobalne zhromadźenstwo ludźi, kotřiž wěrja, zo wotwrjenosć, inowacija a móžnosće su kluč trajneho derjeměća interneta. Smy wot lěta 1998 hromadźe dźěłali, zo bychmy zawěsćili, zo internet so na wašnje wuwiwa, kotrež kóždemu tyje. Najbóle znaty z našich projektow je webwobhladowak Mozilla Firefox.

Projekt Mozilla zepěra so na zhromadźenstwo, zo by prěnjorjadnu softwaru zjawneho žórła wutworił a nowe wašnja kooperacije wuwiwał. Załožujemy zhromadźenstwa ludźi, kotřiž internet k lěpšemu městnu za nas wšěch činja.

Jako wuslědk tutych napinanjow smy rjad principow zestajeli, kotrež mamy za kritiske za internet, zo bychmy dale zjawnemu dobru słužili kaž tež komercielnym aspektam žiwjenja. Tute principy deleka podamy.

Cile za manifest su:

  1. wiziju za internet artikulować, kotruž załožba Mozilla Foundation ma po měnjenju sobuskutkowacych Mozilla spěchować;
  2. ludźi narěčeć, njedźiwajo na jich techniski pozadk;
  3. sobuskutkowacych Mozilla hordych na to činić, štož činimy a nas motiwować dale dźěłać; a
  4. wobłuk za druhich ludźi wutworić, zo bychmy tutu wiziju wo interneće doprědka ćěrili.

Tute principy so same wot so njezwoprawdźeja. Ludźo su trěbne, kotřiž internet wotewrjeny a k městnu aktiwneho wobdźělenja činja - ludźo, kotřiž jako jednotliwcy jednaja, w skupinach hromadźe dźěłaja a druhich nawjeduja. Załožba Mozilla Foundation ma nadawk, principy manifesta Mozilla spěchować. Přeprošujemy druhich, so nam přidružić a internet k dźeń a lěpšemu městnu za kóždeho činić.

Principy

  1. Princip 1
    Internet je integralny dźěl moderneho žiwjenja — klučowa komponenta w kubłanju, komunikaciji, kooperaciji, wobchodźe, zabawjenju a towaršnosći w cyłku.
  2. Princip 2
    Internet je globalna zjawna resursa, kotryž dyrbi wotewrjena a přistupna wostać.
  3. Princip 3
    Internet dyrbi žiwjenje jednotliwych ludźi wobohaćić.
  4. Princip 4
    Wěstota a priwatnosć jednotliwcow w interneće stej fundamentalnej a njesmědźa jej jako opcionalnej wohladować.
  5. Princip 5
    Jednotliwcy dyrbja kmanosć měć, internet a swoje dožiwjenja w nim wuhotować.
  6. Princip 6
    Efektiwita interneta jako zjawna resursa wotwisuje wot komunikacije mjez sobu (protokole, datowe formaty, wobsah), inowacije a decentralneho wobdźělenja swětodaloko.
  7. Princip 7
    Darmotna softwara z wotewrjeneho žórła spěchuje wuwiwanje interneta jako zjawnu resursu.
  8. Princip 8
    Transparentne procesy na zakładźe zhromadźenstwa sylnja wobdźělenje, zamołwitosć a dowěru.
  9. Princip 9
    Komercielne wobdźělenje na wuwiću interneta wjele lěpšinow přinjese; balansa mjez komercielnym profitom a zjawnym wužitkom je rozsudna.
  10. Princip 10
    Zesylnjowanje aspektow zjawneho wužitka interneta je wažny zaměr, kotryž je hódny nałožka na času, kedźbnosći a angažemenće.

Slubjenje za strowy internet

Wotewrjeny, globalny internet je najmócniša resursa za komunikaciju a zhromadne dźěło, kotruž hdy smy widźeli. Sćelesnja někotre našich najhłubšich nadźijow za čłowjeski pokrok. Skići nowe šancy za wuknjenje, tworjenje zrozumjenja za zhromadnu čłowjeskosć a rozrisanje chwatacych problemow, před kotrymiž ludźo wšudźe steja.

Za posledni lětdźěsatk je so tute slubjenje na wšelake wašnja spjelniło. Smy wšak tež widźeli, zo so móc interneta tež wužiwa, zo by rozdwojenje zesylniła, namóc naškarała, hidu wubudźiła a z wotpohladom fakty a woprawdźitosć manipulowała. Smy wuknyli, zo my měli naše cile za čłowjeske byće w interneće jasnišo předstajić. To nětko činimy.

Naše zawjazki

  1. Zawjazk 1
    Zastupujemy internet, kotryž wšě ludy zemje zapřijima - hdźež demografiske kajkosće wosoby jeje přistup online, šancy abo kwalitu dožiwjenja njepostajeja.
  2. Zawjazk 2
    Zastupujemy internet, zo přistojny wobchad mjez sobu, čłowjesku dostojnosć a wosobinsku wurazniwosć spěchuje.
  3. Zawjazk 3
    Zastupujemy internet, kotryž kritiske myslenje, přemyslenu argumentaciju, dźělenu wědu a přepruwujomne fakty wysoko waži.
  4. Zawjazk 4
    Zastupujemy internet, kotryž zhromadne dźěło wšelakich zhromadźenstwow doprědka ćěri, kotrež za zhromadne dobro hromadźe dźěłaja.

Slub Mozilla

Přez projekt Mozilla a přez kóždu organizaciju w swójbje Mozilla slubimy, manifest Mozilla w jeho aktiwity podpěrować. Předewšěm budźemy:

  • technologije wotewrjeneho žórła a zhromadźenstwa wuwiwać a zmóžnić, kotrež principy manifesta podpěraja;
  • wulkotne kupcowske produkty wutworjeć a k dispoziciji stajeć, kotrež principy manifesta podpěraja;
  • aktiwa Mozilla wužiwać (intelektualne swójstwo kaž na př. awtorstwa a wikowanske znamjenja, infrastruktura, financielne srědki a mjeno), zo bychmy internet jako wotewrjenu platformu wobchowali;
  • modele za wutworjenje ekonomiskich hódnotow k zjawnemu wužitkej spěchować; a
  • principy manifesta Mozilla w zjawnym diskursu a znutřka internetneje branže spěchować.

Trjebamy was, zo bychmy manifest doprědka přinjesli

Internet z tutymi kwalitami sam wot so njenastawa. Ludźo a organizacije dyrbja tute cile k internetnej technologiji a k čłowjeskemu dožiwjenju z internetom přinošować. Manifest Mozilla a přidatk reprezentujetej angažowanosć Mozilla za rozšěrjowanje tutych cilow. Mozilla z ludźimi a organizacijemi wšudźe dźěła, kotrež chcedźa internet k hišće lěpšemu městnu za kóždeho činić.

Jeli tutón cil z nami dźěliće, zdźělće nam, kak móžemy pomhać.

A, so wě, wutworjamy Firefox a Thunderbird. To wšitko, zo bychmy ludźom pomhali, internet k strowemu městnu činili.